Een Europa dat
op d'Vermëschung
vun de Kulture setzt.

De lëtzebuergesche Süden an d’direkt Nopeschregioun op där anerer Säit vun der franséischer Grenz hunn eng Geschicht ze zielen. Eng déif europäesch Geschicht, déi mir gär bis un d’Grenze vun Europa – an doriwwer eraus – brénge wëllen. Well hei, am alen industriellen Häerz vun Europa, do, wou emol wichteg Weiche fir d’europäesch Integratioun gestallt goufen, wunnen haut iwwer 120 Nationalitéiten op enkem Raum zesummen. Hei kann een anen, wéi Europa an Zukunft ausgesi kéint. En Europa, dat op d’Vermësche vun de Kulture setzt, en Europa, dat sech dem Wandel vun enger Industriegesellschaft zu enger Wëssensgesellschaft kreativ a mat Courage stellt, en Europa, dat sech och den Erausfuerderunge vun enger ëmmer méi heterogener Gesellschaft bewosst ass, an en Europa, dat sech géint Nationalismus a Xenophobië vun all Genre positionéiert. Mir wëlle Kulturhaaptstad ginn, well mir d’Potenzial vun eiser Regioun notze wëllen an dovun iwwerzeegt sinn, nohalteg op d’Entwécklung vun eiser Regioun, awer och doriwwer eraus awierken ze kënnen.